Kotu ta tura Ngige gidan gyaran hali na Kuje kan zargin badakalar kwangila ta N2.14bn
Wata kotun Abuja ta umurci a tura tsohon ministan kwadago, Chris Ngige, zuwa gidan yari na Kuje kan tuhumar almundahana da kwangilar da kudinsu ya kai N2.14bn.
An gurfanar da Ngige a gaban Mai shari’a Maryam Hassan kan tuhume-tuhume takwas da suka shafi cin hanci, karkatar da kwangila da karɓar rashawa.
EFCC ta yi zargin cewa, a lokacin da yake kula da NSITF tsakanin 2015 da 2023, Ngige ya amince da daruruwan miliyoyin naira a kwangiloli ga kamfanonin da ake alakanta shi da su, ciki har da Cezimo, Zitacom, Jeff & Xris da Olde English.
Haka kuma ana zarginsa da karɓar kyaututtukan N38.6m da N55m daga kamfanonin Cezimo da Zitacom ta sunan kungiyoyin siyasarsa da tallafi.
Ngige ya musanta dukkan tuhume-tuhumen.
Lauyansa ya roki a ba shi beli saboda rashin lafiyarsa, amma EFCC ta yi adawa tana cewa yana da hadarin tserewa, musamman bayan gazawarsa wajen mika fasfo bayan dawowa daga kasashen waje.
Kotun ta dage sauraron bukatar belin zuwa 15 ga Nuwamba, tare da bayar da umarnin a ba shi damar ganin likita yayin da yake a tsare.