Bayan kauracewa taron Gwamna Yusuf, Sanata Kawu Sumaila ya yi wani muhimmin taro da ‘yan majalisar dokokin Kano ta Kudu.
‘Yan majalisar daga yankin Sanatan Kano ta Kudu a ranar Litinin sun yi wani taro mai muhimmanci domin tattaunawa kan makomar siyasarsu, yayin da ake ci gaba da nuna rashin gamsuwa da shugabancin Gwamna Abba Kabir Yusuf.
Taron, wanda Sanata Kawu Sumaila ya jagoranta, ya samu halartar manyan ‘yan majalisar wakilai, ciki har da Alhassan Doguwa, Kabiru Rurum, Abdulmumin Jibrin da Abdullahi Rogo.
Wannan lamari ya zo ne kwana guda bayan da aka ruwaito cewa Messrs Sumaila da Rurum sun kauracewa gayyatar da Gwamna Yusuf ya yi musu na halartar wani babban taro da ‘yan majalisar APC na jiha da na kasa, wanda hakan ke kara nuna karuwar baraka a cikin jam’iyyar a jihar Kano.
Majiyoyi da suka saba da taron ranar Litinin da Sanatan ya shirya a ofishinsa da ke Abuja sun shaida wa DAILY NIGERIAN cewa ‘yan majalisar sun tattauna sosai kan alkiblar siyasarsu, suna ambaton abin da suka kira “rashin kulawa ta siyasa” ga yankin Kano ta Kudu da gwamnatin jihar ta yi.
Duk da cewa har yanzu ba a san ko ‘yan majalisar da suka fusata suna tunanin komawa jam’iyyar African Democratic Congress, ADC ba, alamu sun nuna cewa za su iya ɗaukar mataki mai tsauri kan jam’iyyarsu ta yanzu idan ba a magance koke-koken da suke yi ba.