Sanata Barau Da Harkar Tsaro
Daga Abba Anwar
Ina ga ba zan yi shakkar gwamutsa zance ba, idan na ce Mataimakin Shugaban Majalisar Dattawa na Kasa, Sanata Barau I Jibrin, mutum ne wanda ya yarda ya kuma amince da cewar ita fa harkar tsaro aba ce da ta shafi kowa da kowa. Ya yarda da haka. Kuma ya dade ya na aiki da hakan.
Idan ka yi la’akari da yadda yake tun ma kafin ya zama Sanata ko kafin ya ma zama Mataimakin Shugaban Majalisar Dattawa, za ka iske cewar shi dama can haka Allah Ya yi shi wajen ganin al’umma su na cikin zaman lafiya da juna. Saboda ya yarda cewar ba ta yadda za a yi a fa samu wani cigaban jiha ko kasa, ba tare da zaman lafiya ba.
Tun ma fa daga lokacin da a ka dawo mulkin farar hula a 1999, lokacin da ya zama dan majalisar tarayya mai wakiltar karamar hukumar Tarauni, ya yi namiji sosai wajen kawo kudurorin da za su inganta harkar tsaro a fadin tarayyar Najeriya.
Haka nan kuma da ya zama Sanata mai wakiltar Kano Ta Arewa, har zuwa lokacin da ya zama Mataimakin Shugaban Majalisar Dattawa na Kasa, ya kasance mutum ne da ya yi fice kan hobbasa wajen tabbatar da harkar tsaro a jihar Kano gaba daya.
Ban dai ce babu ba, amman har yanzu ban ga dan siyasa kuma jagoran da yake da abubuwan kawo tsaro da inganta zaman lafiya kamar Sanata Barau ba. A jihar Kano da ma arewacin Najeriya. Idan ka na son ka gane hakan, to ka je ka bincika manyan jami’an tsaro da suke yankin da yake wakilta da ma jihar Kano gaba daya. Tun da dai sanin kowa ne cewar ita harkar tsaro ba aba ce da za a fito a na ta terere da ita ba.
‘Yan watannin baya kadan da su ka wuce fa ya sayi babura guda dubu daya (1,000) ya bayar ga shalkwatar hukumar ‘yan sanda ta kasa, reshen jihar Kano, dan a rabawa yan sanda saboda su ji dadin gudanar da ayyukansu. An raba wadannan babura ne ga ofisoshin ‘yan sanda 76 dake jihar. Daga ciki a ka rabar da guda dari bakwai (700) ga can mazabarsa ta Kano ta Arewa da yake wakilta a Majalisa. Ragowar guda dari uku (300) kuma a ka rabar ga ofisoshin ‘yan sanda dake Kano ta Tsakiya da kuma Kano ta Kudu.
Kuma fa kafin nan ya bayar da motocin aiki ga hukumar yan sandan ta jihar Kano. Baya ga gyararraki da ya yi ga gine-ginen hukumar a hedikwatar hukumar da ke Bompai a Kano. Babban abin lura a nan kuma shine, a wadannan ayyukan da makamantansu ya kashe sama da Naira Bilyan Daya (N1b). Shi fa Sanata Barau jagora ne da ya yarda da zaman lafiyar al’ummar sa da ma al’ummar kasa gaba daya.
Shi fa ba karamin mutum ne ba wanda tun asalinsa mai son zaman lafiya ne. Kwanan nan fa a wani gagarumin taro da a ka yi a Kaduna, na Kungiyar Tuntuba ta Arewa, wato Arewa Consultative Forum (ACF), ya bukaci hadin gwuiwa daga dukkanin shugabannin al’umma na arewa da cewa ya zama dole a hada karfi da karfe wajen magance matsalolin tsaro da su ka yi wa arewa katutu.
Ya fadi irin kokarin da suke yi a matsayin ‘yan majalisa na kasa wajen ganin an kara inganta tsare-tsare da za su kawo mana zaman lafiya a arewa cikin gaggawa. A wajen taron ya kuma bayyana irin hobbasar da ofishin sa yake yi tare da ofishin Kakakin Majalisar Wakilai ta Kasa, Tajuddeen Abbas da kuma gwamnoninmu na arewa wajen ganin an inganta harkar tsaro a wannan bangare namu na arewa.
Baya ga nan kuma, ya yi kokarin gaske wajen daukar nauyin karatun matasa a manyan makarantunmu da kuma a kasashen wajen. Wasu daga irin wadannan samari idan ba su samu daukar nauyin karatu ba za su iya fadawa dukkan abinda su ka ga dama dan dole dai ita rayuwa sai an yi ta. Haka ya dauke dubban matasa yake biya musu kudaden karatu daga can Kano ta Arewa da kuma jihar Kano din ma gaba daya.
Irin wannan abu ai ba karamin tallafawa zaman lafiyar al’umma ba ne. Baya ga tallafawa rayuwar matasa da mata da ya shahara a kai. Duk saboda a samarwa al’umma yanayi mai kyau na rayuwa. Wanda hakan zai sa su gujewa afkawa kan abubuwan da ba haka ba na rayuwa.
Amman dai wani babban abinda ya dan ja hankali na kwanan nan shine da na ji gwamnatin jihar Kano ta bakin Maigirma Kwamishinan Yada Labarai, Comrade Abdullahi Waiya, ta zargi Sanata Barau da yin kalaman da za su ingiza yanayin rashin tsaro a jihar.
Ni dai a waje na Maigirma Kwamishina kawai ya dan yi tuntuben harshe ne har ya ambaci sunan Sanata Barau. Saboda shi kan sa Kwamishinan da ma ita kanta gwamnatin jihar Kanon sun san irin kokarin Barau din wajen inganta harkar tsaro a jihar tamu.
Bayan Kwamishina Waiya ya yi wancan taron da ‘yan jarida ne sai kuma na ga mataimaki na musamman kan harkar yada labarai na Sanata Barau, wato Isma’il Mudasshir, ya fitar da sanarwar cewar ofishin Sanatan ya na kalubalantar gwamnatin Kanon da ta kawo wata shaida mai kwari lokacin da Sanatan ke yin irin wadancan kalaman da a ke zargin sa da su.
Ni fa a nawa ganin kuma a iya bincike na, babu fa wani lokaci da Sanata Barau ya taba yin maganar da za ta ingiza ko ta kara kunna wutar rashin zaman lafiya a Kano. Gaskiyar zance ban san lokacin ba. Kuma na bincika kafin na yi wannan rubutun ban samu wanda ya ce min ya na da shaida daga muryar Sanata ko daga wani faifan bidiyo ba da a ka samu Sanatan da yin hakan.
Shi ya sa ma fa na ce na tabbatar Maigirma Kwamishina Waiya kawai subutar baki ya yi, ya ambaci sunan Sanata Barau. To hakan ma shi ya sa ni ba ma zan wani kalubalanci Waiyan ba kan abinda ya ce a kan Sanatan. Illa iyaka kawai na san da cewa, kalubalen da ofishin Sanata Barau din su ka yi masa, ba zai iya angijewa ba. Dan kuwa babu wannan irin shaidar a kan Barau. Ba wai ba inke!
Cikin sa’o’i kadan kuma bayan da Mudasshir ya fitar da waccan sanarwa daga ofishin Sanata Barau, sai ga shi kuma an samu wani mai suna Abdullahi Hafiz, Allah Ya sa dai sunan gaskiya ne, ba coge ba ne, ya na kalubalantar Mudasshir kan wancan kalubalen da ya yi ga Maigirma Kwamishina.
A nasa rubutun na kalubale, shi Hafiz din, wanda ina fata sunan gaskiya ne, gaba daya ma bai tabo maganar ma da a ke yi ba tun asali. Kawai ya tafi can wani waje daban. Na ce Ikon Allah hahaha.
Ai babban abinda ya kawo har Mudasshir ya kalubalanci Maigirma Kwamishina Waiya shine, maganar da Waiyan ya yi cewar Sanata Barau ya na yin kalaman da ka iya jawo kara tabarbarewar harkar tsaro a Kano. Wanda har shi Mudasshir ya nemi da a kawo wata shaida ko guda daya ce, da zargin da a ke wa Sanata ko zai zama gaskiya. A kan haka fa a ke ta mukabalar.
Amman shi Hafiz daga zuwansa a nasa kalubalen, kawai sai ya fada maganar ayyukan raya kasa da wasu labarurruka da su ka faru a baya. Ko da wasa bai ma ce ga wata shaida da a ka samu Sanata Barau ya na maganar da ke jawo iza wutar rashin zaman lafiya a Kano. Ko a wata shaidar muryar Barau din ko a wani bidiyo da Barau din ya yi waccan magana da a ke zargin sa da yi ba.
Gaba daya kawai sai na ga Waiya da Mudasshir sun yi gabas, shi kuma Hafiz ya yi kudu ko arewa ko ya makale a can wani loko mara bullewa. Na ce TIRKASHI!!!
Ni dai har yanzu ina kan bakana, cewar Kwamishina Waiya subutar baki ce ta sa ya kira sunan Sanata Barau a wancan taron manema labarai din da ya yi. Amma ba wai dan tun asali akwai maganar Sanatan ba.
Shi kuma Mudasshir ina ba shi shawarar kar ma ya tsaya jiran Comrade Waiya kan cewar wai za a ba shi hujjar da ya tambaya. Dan kuwa da farko dama subutar baki a ka yi a ka fadi sunan Sanata. Abu na biyu kuma shine, hujjar ma babu ita. Dan kuwa babu itan.
Anwar ya rubuta wannan daga Kano,
Lahadi, 30 ga watan Nuwamba, 2025