Karamin Ministan Gidaje da Ci Gaban Birane, Abdullahi Yusuf Ata ya mayar da martani ga gargadin da jam’iyyar su ta APC) a Kano ta yi masa, ya na mai cewa kalaman da ya yi kwanan nan ya na da ƴancin faɗin albarkacin bakin sa.
Ya kuma ce tun da a dimokuraɗiyya ake, ya na da ƴancin yin magana ba tare da niyyar haifar da rashin jituwa a cikin jam’iyyar ba.
A wata takarda da shugaban jam’iyyar na jiha, Abdullahi Abbas, ya sanya wa hannu, ya ce Ata na maganganu akan siyasar cikin gida kamar shi ne kakakin jam’iyyar, inda ya gargade shi da ya dena furta kalaman da ka iya haifar da rikici a jam’iyyar ko kuma su maka shi a kotu.
Abbas ya kuma aika kwafin takardar zuwa ga Shugaba Bola Tinubu da kuma sakateriyar kasa ta APC.
Sai dai a cikin wata sanarwa da mai taimaka masa kan harkokin yada labarai, Seyi Olorunsola, ya fitar, ministan ya ce ya fitar da wannan martani ne domin fayyace batun, wayar da kan jama’a, da kuma jaddada biyayyarsa maras gushewa ga jam’iyya da Shugaban kasa.
Ata ya gargadi ga shuagabancin Abbas da ya dena yada batutuwan cikin gida na jam’iyya a idon duniya, musamman a wannan lokaci da ƙasar ke fama da matsalolin tsaro.
Sanarwar ta ce: “Mai Girma Minista yana kallon yunkurin rubuta da yada irin wannan takarda—musamman wacce aka aika wa shugaban kasa kwafinta—a wani lokaci da Najeriya ke fuskantar ƙaruwar matsalar tsaro, a matsayin wani abu da bai dace ba domin zai dauke hankali ga kokarin samar da tsaro a kasa.”
“Yayin da Shugaban Kasa ya dakatar da wasu ayyukan sa na kasa da kasa, ciki har da taron G-20 a Afirka ta Kudu da kuma wani taron AU a Angola, domin mayar da hankali kan batutuwan tsaro na cikin gida, ya kamata dukkan shugabanni masu kishin kasa su maida hankali kan haɗin kai, nutsuwa, da goyon baya mara yankewa ga Shugaban Kasa.”
“Minista na so ya jaddada cewa, baya ga kasancewarsa Ministan Tarayyar Najeriya da kuma cikakken memba na APC a jihar Kano, shi ɗan Najeriya ne da kundin tsarin mulki ya ba shi ‘yancin faɗin ra’ayi da fadin albarkacin baki.”